گِدار

جمیڑیءِ روکپت

منیر احمد بادینی

بہر4 : بیگہ

3 سُہب 5 نیمروچ

وھدیکہ جمڑّی ءِ پیروزگیں ٹاک نیمروچ ءِ روچ ءِ برئکش ءِ چیر ءَ گرگشان بوت ءُ آئی اژدریں زبان ایوک ءَ تاں تیاب ءِ ریکان سر بوت ءُ آ دیم نہ بوت تو آ وتی جند ءِ جسد ءُ جون ءِ تہ ءَ گرگشان برز ءَ بال بوان چو کہ چہ سارت مہ کپ اِیت! ءُ آئی سربر چو برنجی ئیں تالے ءَ شہم جنان بوت کہ گندوک ءِ چم اود ءَ اوشتات نہ کرتاں کہ ھر چمّ وت ءَ را چرائی چارگ ءَ دور داران بوت تانکہ روچ بیگہ بوت ءُ زر چو پاگاس ءَ وتی رنگ بدل کنان سرد کپان بوت۔

ءُ گوں روچ بیگہ بُوگ ءَ بان ءَ کوٹی ءُ کوھانی ساھگ دراج بوان بوتاں ءُ ھر مردم وش بوت چوکہ زندگانی ءِ جہد ءِ تہ ءَ مردمان یک بارسو ءُ یک سکینے بہ رس اِیت۔۔۔!

چہ روچ ءِ کپگ ءَ باز ساری من ریسٹ ھائوس ءِ خدمتگار ءَ گْوشت آ دو کرشی ریسٹ ھائوس ءِ تلگ ءَ ایر بکنت کہ پدا من ھموداں نشتُن ءُ جمڑی ءِ پیروز گیں آپانی سر ءَ پاد آئوکیں چولان چاران بوت ءُ روچ ءِ بْرمشان سیل کنان بوت کہ روچ چو جمجلائی کنوکیں ءَ لمبوکیں پومپے ءِ پیم ءَ درا بوت ءُ من ءَ ھیال اھت کہ چے جرنیل ءِ جنین آدم ھمے پیم ءَ روچ ءِ ایرات ءَ چاراِتگ چو کہ من چارگ ءَ ات اوں یاکہ آئی چمانی گندگ چٹ جتائیں گندگے بوتگ؟

ءُ پدا من وت ءَ را کرسی ءِ سر ءَ شر جامہ نند کرت ءُ روچ ءِ جالگ ءِ سفر ءَ چاران بوت کہ نوں من بلکناں روچ ءِ کپگ ءَ وتی چمانی تہ ءَ چارگ ءَ نہ ات اوں بلکنا مسز ڈورس لینگ ءِ چمانی تہ ءَ چارگ ءَ ات اوں ! ءُ من ءَ چوکہ مسز ڈورس لینگ ءِ چمانی تہ ءَ روچ کپگ ءِ ندارگ دوست آیگ ءَ ات۔ ءُ یکدمے من ءَ ھنچش توراِت چو کہ من وت مسز ڈورس لینگ اوں ، اتحادی پئوجیانی انگریز جرنیل ءِ جنین!۔۔۔۔

زمانگ ھما انت 1944؁ء یاکہ1943؁ء جنگ عظیم ءِ سیائیں لوڑ ءُ جمبر گوات گران ھر نیمگ ءَ تالان انت۔ دژمن ءَ ھر جنگی پڑ ءَ بے سوبی بُوگ ءَ انت، کسّ نہ زانت کہ دیمتر ءَ چے بیت؟… بلے مروچی جرنیل وش انت کہ انوں اَچ زر ءَ اھتگ کہ اُود ءَ مئے اتحادی پئوجانی بحری بیڑہ اوشتوک انت کہ چہ دور ءَ بحری جہاز چو شارے ءَ درا باں کہ گب گبّ پچیں رزر ءِ تہ ءَ چپ چپ اوشتوک انت ءُ آھانی سر ءَ اتحادی پئوجانی بیرک گوات ءِ تہ ءَ پترنک جنان انت کہ مئے یونین جیک ءِ بیرک چہ کلّان دیم ءَ انت، امریکائی جہازانی سر ءَ آھانی بیرک جنوک انت ءُ چہ کلاّان مزنیں حبر ایش انت کہ ا رسی جہاز ھم جہازانی فلوٹیلا ءَ گون انت۔ آنکہ ارس ءُ مئے زند گوازینگ ءِ نیام ءَ مزنیں پرکے ھست کہ ماں وت ءَ را آزات دنیا ءِ مردم حیال کناں ءُ ارس ءِ تہ ءَ یک پارٹی حکومت انت۔ ادا کمیونزم و سوشلزم انت ءُ مئے نظام سرمایہ داری انت۔ ارس درائیں دنیا ءَ سوشلسٹ نظام ءِ تہ ءَ آرگ لوٹ اِیت بلے ماں لوٹاں کہ دنیا چہ یک پارٹی ءِ مطلق العنانی ءَ چہ دور بہ بیت۔ اے دوئیں نظریہ آنی نیام ءَ جنگ انت بلے اے نیام ءَ چہ کلّان مزنیں جنگ جرمن فسطائیانی انت، ٹیلرئیگ انت کہ یورپ ءِ دو بلا ءُ سیائیں قوت، جرمنی ءُ اٹلی ،ہٹلر ءُ مسولنی ءِ سروکی ءَ پہ دنیا ءِ تباھی ءُ زیانی ءَ یکجاہ بوتگ اَنت، کہ شگرب ءِ تہ ءَ جاپان ءُ نیام ءَ ترکی انت کہ آ آزات دنیا ءُ ارس ءِ کمیونزم ھر دوکانی بدی وار ءَ بدواہ انت کہ آ دنیا ءِ سر ءَ یک فسطائیتے آرگ لوٹ اِیت یعنی گوں زور ءَ زوراکی حکومت کنگ۔ ہٹلر تو گْوش اِیت کہ جرمن قوم ءُ جرمن نسل چہ کلّان برزیں ءُ اعلیٰ ترین نسل انت، دنیا ءِ تہ ءَ یک نوکیں سوشل ڈارونزم پاد اَھتگ، حدامئے درا آں بہ رکھین اِیت، بلے من ءَ امیت انت کہ الم ءَ ماں کٹ ءُ سوب ءَ گوں دوچار باں ءُ جرمن، لاطینی ءُ جاپانی فسطائیاں شکست بیت۔۔۔۔ پمیشا تو ارس گوں آزاتیں دنیا ءَ یکجاہ جرمن ءُ لاطینی ءَ جاپانی فسطائیانی گوں مڑگ ءَ انت… اے ارس ءِ بلکنا یک شریں پیسلہ یے کہ ارسی ایشرا دئیاں گوئشاں یعنے دو جتائیں نظریاتی ملک گوں وت ءَ تپاک بکناں ءُ چہ جنگ ءَ بگیر وتی ویلانی ھاتر ءَ راھے دربگیج اَنت!… ائے شرین ھبرے۔۔۔

…مروچی سوب ءَ جرنیل صاحب جمڑی ءِ زر ءِ تہ ءَ پہ وتی جہاز ءَ روگ ءَ ساری من ءَ دروت دات ءَ پدا رادگ بوت کہ مروچی جرنیل صاحب وتی اسپیتین وردی ءَ یونیفارم ءُ اسپتین کلاہءِ تہ ءَ گواچنی امیرالجرئے درا بوت کہ آئی دراجیں بالاد آئی سوزیں چم ءُ آئی دستانی سکی ءُ بدن ءِ لاگری من ءَ درا دوست باں ءُ من چہ وتی سیر ءَ ساری لوٹ اِت کہ منی مرد ھنچشین مردے بہ بیت کہ آئیءِ پیکر ءِ سر ءَ من پہر بہ بنداں !… ءُ گواچنی من وتی امیرالجر ءِ سر ءَ پہر بنداں !…

…ءُ من وشی بُوگ ءَ انت کہ من گوں وتی امیرالجر ءَ گون اوں ءُ جنگ ءِ تہ ءَ چو بزاں من ھم بہرزورگ ءَ اوں ،دوئمی جنگ عظیم ءِ تہ ءَ کہ دنیا ءِ واب پرّیتگ ءَ قومانی حطرہ زرتگ،ھر قوم ءُ ملک پریشان انت کہ گوں آئی چے بیت ءُ چے نہ بیت۔ بچار من بنچک ءَ بیخ ءُ بن ءَ بنیات ءَ حطرہ انت ءُ ماں لوٹاں کہ اے جنگ یکدم ھلاس بہ بیت تانکہ ماں پہ وت ءَ پہ وتی آئیوکیں نسلاں یک نوکیں دنیایے بہ ٹاھین آں ، یک نوکیں امیتے بہ دیاں نہ کہ اے جنگ مئے امیتاں ھم زیان کنگ ءَ اِنت…! ءُ من ءَ وشی بُوگ ءَ اِنت کہ من گوں وتی امیرالجر ءَ گون اوں کہ پدا وھدے ماں سوب کناں تو من ءَ امیت انت کہ منی امیر الجر ملکہ معظمہ مزنیں لقبے دنت!… اے من ءَ امیت انت… ملکہ معظمہ ءَ من گْوستگیں زمستان ءَ ونڈ سر ءِ یک دیوانیءِ تہ ءَ دیستگ ات کہ آئی مزنیں ھیٹ، آئی بشکھندگی، آئی زیبائیں دنتان کہ مردم لوٹ اِیت کہ مردم یکدم آئرا وتی مزنیں گْوھارجوڑبکنت چی ءَ کہ آئرا گوں ماں ھنچش مہروانی ھست چوکہ یک مزنیں گْوھارے ءَ گوں وتی ایدگہ کسان ءَ گْونڈیں گْوھار ءُ براسان بیت۔ ملکہ معظمہ چٹ پما یک مزنیں گْوھارے۔ ءُ مارا حدائی شکر انت کہ مارا ملکہ معظمہ رستگ۔ آئی لاگر ءُ شتکین مرد ڈیوک ءَ بچار چنکس نما کنت کہ گوں ملکہ معظمہ پشت پشت گون انت چو کہ من وتی امیر الجر ءِ پشت ءَ گون اوں ۔ منی امیر الجر ھم چہ ڈیوک ءَ چہ ہرل آف ونڈسر ءَ کم نہ انت۔ من آئی سر ءَ پہر بندآں ۔

دوشی جمڑّی ءِ بال دوم ءِ تہ ءَ من گوں یک دگہ ورنائیں افسرے ءَ ڈانس کنان اِت اوں کہ آ مئے نیوی ءِ تہ ءَ کپتانے ءُ سک زیبا اِنت کہ آ منی دستانی پنجگانی تہ ءَ وتی پنجگاں دیاں ڈانس کنان ات ءُ من ءَ منی امیر اجلر ءِ بارو ءَ گْوشگ ءَ ات کہ آئرا چنکس ایدگرانی حیالداری ءِ مارشت ات کہ آ نہ لوٹ اِت کہ اد ءَ کسے ءَ را ڈکھ ءُ تکلیفے بہ بیت۔

…چی ءَ کہ بحرۂ جہازانی چن ءُ لانچ کئے دست ءَ انت تو کپتان کرار کراریں میوزک ءِ لہڑگانی سر ءَ من ءَ گْوشگ ءَ اَت کہ امیر الجر وھدیکہ درائیں اتحادی پئوجیانی دیوان ءَ یونین جیک ءِ چیر’ ایچ ایم ایسن باربیڈوس‘ ءِ لوٹائینت کہ ایشی تہ ءَ درائیں یوروپائی جہازانی امیر الجر باں کہ وھدے من ارس ءِ امیرالجر ءَ گندیں تو من ءَ سک وشی بیت کہ آ مئے جہاز ءِ تہ ءَ یونین جیک ءِ چیر ءَ جنگی نکشہاں چاراِیت ءُ جنگی بریفنگ گوش داریت تو من پہر بنداں کہ ارس پیمیں مستریں طاقت ھم گوں ماں نندوک انت، آنکہ ارس ءَ مئے آزاتیں دنیا ءِ حیال ءِ سر ءَ سک ایراد ھست بلے نوں کہ جرمنی ارس ءِ سر ءَ ارش کرتگ ءَ اسٹالن گراد ءِ سر ءَ جنگ جاری ءُ ساری انت تو ارس مجبور انت کہ آ گوں یکے بہ بیت نہ کہ ارس مان اِیت ءُ نہ کہ آئی کمیونزم ءُ سوشلزم۔

من ورنائیں کپتان ءَ بگل مہ بگل ڈانس کنان وتی امیر الجر ءِ بارو ءَ کسّہ گوش دارگ ءَ اِت اوں ءُ من وشی بُوگ ءَ اِنت کہ منی امیر الجر درائیں امیر بحرانی تہ ءَ تاک انت۔۔

…ھما شپ ’بال روم‘ ءِ تہ ءَ تاں دیرڈانس کنان رند ءَ شمپین وران درائیں افسر ءُ آیانی جنین امیرالجر ءِ ایدم آدیم ءَ نشتاں کہ من وتی امیر الجر ءِ کنک ءُ کشک ءَ نندوک آیانی گپان گوشدارگ ءَ اِت اوں کہ دژمن ءَ درائیں یورپ ءُ ایشیا ءِ تہ ءَ شکست ءِ سر ءَ شکست بُوگ ءَ ات کہ درائیں افسر ءُ آیانی جنین آدمانی دیم چہ وشی ءَ برئکش دئیان ات کہ ھر چنت زوت بہ بیت کہ اے جنگ بہ کُٹّ اِیت۔ بہ کُٹّ اِیت اے جنگ!

وھدے ھما شپ دیر ءَ من ءُ منی امیر الجر وتی وتاک ءِ تہ ءَ اھت اوں تو امیر الجر من ءَ حال دات کہ ارس جہاز ءِ امیر البحر ترند طبعیتیں مردمے کہ ھر وھداں ترندان ترند انت کہ چرآئی درائیں افسر ترس اَنت، چو کہ آ وتی جہاز ءِ تہ ءَ کمیونزم نافذ بہ کنت!… ءُ امیر البحر ءِ ھمے گپ من ءَ سک دوست بوتاں ءُ ماں ارس ءِ امیر البحر ءِ حرکتانی سر ءَ تاں دیر کھندیتاں …

ءُ امیر البحر راست گْوش اِیت کہ آخر اے ارسی مردم کمیونزم ءَ پرچے مذہبے جوڑ کرتگ انت؟

جمڑی ءِ مروچیگیں دیگر ءَ شام چرائی درائیں بیگہ شام ءَ دیگراں نمادار ءُ زیبا اتاں ۔

…ءُ من وتی وتاک ءِ تلگ ءِ سر ءَ نندوک روچ ءِ کپگ ءَ چارگ ءَ ات ءُ من ءَ یکدم مارشت بُوگ ءَ ات چوکہ من یک دگہ دنیائی ءِ تہ ءَ بیا ئیں ، چوکہ جمڑی ءِ تیاب چہ دنیا ءِ کلّین تیاباں گیش نمادار، صاف، تچک ءُ ازلی بیت۔ ءُ من سک وش اوں کہ اتحادی پئوجی جمڑی ءَ وتی وتاک کرتاں نہ کہ اے تچکین بندرءُ تیاب ءَ دگہ شرتریں ھندھست کہ من امیر البحرین ءَ موٹر بوٹ ءِ تہ ءَ ، آئی جہاز ءِ تہ ءَ درائیں بندر ءَ تیاباں نشان داتگ بلے جمڑی ءِ وتی زیب ءُ نمایے کہ ایشی زیب ءُ نما دنیا ءَ نیست! یک، دوئمی جمڑی چہ ایران ءَ نزینک انت کہ ایشی برزگ ءَ اوگانستان بنا بیت کہ اتحادی پئوجیاں ترس انت کہ جرمن وتی زمینی لشکر ءَ انگر دیم مہ دیاں پمیشا آھشکی ءُ آپ ھر دوکانی سیم سر ءَ نندوک انت۔ من چہ امیر البحر اُشکتگ کہ اے ڈیھ ءِ کتبی نیمگ ءَ جرمن ءِ جاسوسی ہٹلر ءِ راھبندانی واسطہ گوں ملکی ئیں مردماں کار کنگ ءَ انت ءُ ہندوستان ءِ آزات ھندوستان ءِ یک پئوجے جوڑ کنگ بوتگ کہ آ پہ ھندوستان ءِ آزاتی ءَ گوں جاپانیاں گپ ءُ تران کنگ ءَ انت کہ اے درائیں حطرہاں پد اتحادی جمڑی ءَ وتی وتاک جوڑ کرتگ انت ءُ ایش پمن یک وشی بہتیءِ ھبرے کہ مروچی من گوں وتی مرد ءَ گون اوں ءُ جمڑی ءِ گواتانی تہ ءَ اوں ۔

تو من مروچیگیں بیگہ ءِ گپ جنگ ءَ اوں کہ اکتوبر ماہ ءِ سری روچانی پرگوئشیں گواتانی تہ ءَ جمڑی ءِ پیروز گیں آپ چہ دور ءَ چو آدینک ءَ بل بلان ات ءُ روچ ءِ پومپ کدی زرد، کدی نارنجی، کدی وانگڑی ءُ نارنجی ءِ ھوار توارین رنگانی تہ ءَ برئکش دیان چہ گْوزند ءَ آدیم کپان ات ءُ منی کلکان چہ زر ءَ پاد آیوکیں سر گوئش دْروت دیان اتاں کہ منی چم جمڑی ءِ پشتی نیمگ ءِ بور ءُ حاکی ئیں کوہ ءَ ٹبان سر کپان ءُ واردم ءَ بے جمڑی ءِ کپوکیں روچ ءَ کپان اتاں کہ من مروچیگیں بیگہ ءَ کدی نہ شموشیں ءُ چون ایشی تہ ءَ یک جادو ءُ سہرءِ پیمیں کششے ات کہ من ایشی تہ ءَ ڈب شتگ ات کہ منی چار مہ کنڈ یک امن ءُ ایمنی یے اَت۔ دور مئے اتحادی پئوجیانی آپی جہازانی فلوئیلا دور ءَ اوشتوک اے ھند ءَ اے آپان چہ دژمن ءَ رکینگ ءَ اتاں کہ پدا پہ وتی پئوجیانی کٹ ءُ سوب ءِ واسطہ چہ منی دپ ءَ دعا دراھتاں کہ یا حدا تو مئے مردماں سوب بدئے! یا حدا دژمن ءَ کور بکن! یا حدا آزاتیں دنیا ءِ واباں پیلو بکن۔

مروچیگیں دیگر ءَ من وتی جاہ ءَ نندوک اچ سُرگ ءَ نہ ات چشکہ منی درائیں بت سنگ بہ بیت، من سنگ بوتگ اَت، من دنیا ءِ تہ ءَ بازیں تیاب دیستگ ات، وتی ملک انگلستان ءِ تیابانی سر ءَ من کپوکیں روچ ءِ ندارگ کرتگ ات بلے ھما ندارگ کہ جمڑی ءِ تیاب ءَ ات آ دنیا ءِ اچ تیاب ءِ سر ءَ نہ ات۔

روچ کرار کرار کپگ ءَ ات کہ منی چم برائی سک اتاں کہ ناگت ءَ دور چہ کتبی نیمگ ءَ بالی گراب ءِ گرگ بوت کہ اے گورئگ کوار سرار ودّان بوت ءَ پدا نزینک تر بوان بوت ءُ من وتی چماں اولی وار چہ روچ ءَ برز کرت ءَ بالی گراب ءَ چارت کہ اے مئے اتحادی پئوجیانی ’رائل ایرفورس‘ ءِ یک شاکے ات کہ آ ھر دیگر ءَ سیم سر ءَ بال کنات بوت ءُ پدا جمڑی ءِ سجئیں بالی پٹ ءَ نشت کہ چہ مئے وتاک ءَ برزگ ءَ کوہ ءِ ڈل ءِ سر ءَ نوں اے بالی گراب نندان ات کہ اد ءَ مئے ایدگہ جنگی بالی گرابانی ’ھینگر‘ئے ھم ھست کہ ایش درا جرنیل ءَ منی امیر البحر ءِ دست ءَ انت۔۔۔۔!

من شاک بالی گراب ءِ نمبران وانان بوت کہ آ چہ منی سر ءَ گوئزان ات کہ من چرائی نمبر ءَ زانت کہ ایشی پائلٹ کئے انت؟ من درائیں نیوی ءَ ایرفورس ءُ آرمی افسران زاناں کہ آ اد ءَ مئے’ بیس‘ ءِ تہ ءَ وتاک انت کہ بال روم ءِ تہ ءَ ماں شپ درا یکجاہ شراب وراں ءُ ڈانس کناں کہ مئے زند گوں وت یک دگر ءَ چو بزاں بندوک انت چی ءَ کہ ماں درا جنگءِ تہ ءَ ، جنگی جاورانی تہ ءَ ان ءُ مئے درائیں مردمانی یک لیکہے ، آزات دنیا ءِ رکینگ!

تو من ذکر کنگ ءَ اِت اوں کہ مروچیگیں دیگر ءَ جمڑی ءِ گْوزند ءَ روچ ایرمات ءِ منی ندارگ ءِ چارگ ءَ شاک بالی گراب حراب کرت کہ گوں آئی توار ءَ منی گوں جمڑی ءِ روچ ءِ ایرمالی ءِ دلگوشی پرشت… اے شاک بالی گراب ءَ فلائٹ لیفٹینٹ ’اَوروَل ‘ چلائینگ ءَ ات، جارج اورویل!… باز شیتان باز ھشیاریں ورنایے اَت، آ مدام کدی کدی سوب مالہ پہ وتی جاسوسی ءِ کاران بال کنت ءُ چہ بیس ءِ سر ءَ گْوزاِیت کہ ماں درا چرآئی سیلف پروپیلرانی توار ءَ پاد کایاں ۔

…ءُ من باز رنداں ’ میس‘ ءِ تہ ءَ ’بال روم‘ ءُ کتاب جاہ ءِ تہ ءَ جارج اورول، گْوشتگ کہ چو شیتانی ءَ مکر مکنت، بلے آکنداِیت ءُ وتی کلاہ ءَ در کنت ءُ منی دیم ءَ وتی سر ءَ جال کنت ءُ گْوش اِیت ’’جرنیل صاحب ءِ حکم انت کہ من بال بکناں ، من ءَ حکم ءَ منّگی انت ءُ من بال کناں ، اگاں تو گْوش ئے کہ جرنیل صاحب ءِ حکم ءَ مہ منّ تو من حاضر!

وھدے جار ج اورل ءِ چشیں گپّان گوشداریں تو من ھم چپ کنیں کھندین کہ یک ءَ دو رندان آ من ءَ لوٹ اِتگ کہ من ھم گوں آئی بال بکنیں تانکہ جمڑی ءِ ھما ندارگ کہ چہ گواتاں درا بیت آ بلکنا چہ ڈگار ءَ درا نہ بیت۔ چی ءَ کہ’ اورول‘ ءِ گْوشگ ھمیش انت کہ آئی شاک ءَ جمڑی ءِ گوات بال دیاں نہ کہ آئی اِنجن!… ءُ اورول ءِ گْوشگ ھمیش انت کہ جمڑی ءِ گواتان حدا وت یک دگہ سرگوشی ءَ یک دگہ جادویے داتگ کہ دنیا ءِ ایدگہ گواتانی تہ ءَ نیست۔ ءُ جارج اورول گْوشت کہ وھدے آ بال کنت تو یکدم جمڑی ءِ تیاب گوں وتی پیروز گیں آپاں درا کنت کہ یک نیمگ ءَ روچ درآیگ ءَ انت کہ آپ برئکش دیان انت، دوئمی نیمگ ءَ روچ تنے وھدی سر نہ بوتگ بزّ ءُ سیائیں آپ درا باں ءُ پشت ءَ بوریں کوہ، کوھانی تہ ءَ پٹ ءُ ڈل ءُ ڈگار ءَ ڈگار ءِ سر ءَ سبزیں کِکّ ءُ کاہ بوچ درا یک دگہ ندارگ ءِ چمانی دیم ءَ کاراَنت کہ مردم حدائی وتی ازم کاری ءِ سر ءَ گڑاِیت۔ جارج اورل مسکرہ ءِ تہ ءَ گوئشیت کہ جنگ ءَ پد آ ھمداں سیر کنت ءُ گوں ملکی ءِ جنکی ءَ وھد گوازین اِیت، کہ کدی کدی تیاب ءِ سر ءَ مارا ملکی مردم گندگ ءَ کایاں کہ آ گیشتر ماھی گیر انت، بزھگ، لنٹ ھشک، لاچار، بے تعلیم، بے ازم کہ شپ ءَ آیانی لوگانی تہ ءَ ڈیوایے ھم روک نہ بیت، کہ یک ھاموش شپ ءِ تہ ءَ آ وتی زند ءَ گوازینان، جرنیل صاحب گْوشت کہ پرے مردماں باید انت کہ مپت علاج بہ بیت ءُ پرایاں اسکولے مِکّ کنگ بہ بیت۔ یک رندے جرنیل صاحب وت تیاب ءَ شت ءُ آیانی کمک کرت کہ جرنیل ءَ اے مردم سک دوست باں کہ جرنیل گْوشت کہ ماں نوں اِد ءَ وتاک ایں ، وھدیکہ اے مرد چہ قرنانی قرن اد ءَ نندوک وتی تیاباں رکھیننگ ءَ انت!…

ھما دیگر ءَ وھدے جارج اورول مئے پشت ءَ کچہ ئیں بالی پٹ ءَ نشت تو من ءَ برآئی زار اھت ءُ انِشپی من لوٹاں کہ آئرا بگوئشاں کہ وھدے آ چہ وتی جاسوسی ءَ دست ھلاس بیت تو حدائی نام ءَ وتی بالی گراب ءَ شام ءُ دیگر ءِ تہ ءَ جمڑی ءِ بالی پٹ ءَ مہ نندارین اِیت۔۔۔۔ یا ھما وھد ءَ وھدیکہ جمڑی ءِ گْوزند ءَ روچ ایرمات بُوگ ءَ بہ بیت…!

………

وھدیکہ روچ کپگ ءَ بوت تو میر مولاداد اھت ءُ ھورکیں کرشی ءِ سر ءَ نشت۔ پدا ماں ھر دو جمڑی ءِ روچ کپگ ءَ چاران بوتاں کہ یکدمے ساری من اتحادی پئوجانی جرنیل ءِ جنین آدم ڈورس لینگ ءِ چماں گوں جمڑی ءِ روچ کپگ ءَ چاران ات اوں ۔

پدا میر مولاداد من ءَ حال دیان بوت کہ آئرا تحصیلدار نذیر تیاب ءَ برتگ اَت کہ اودا ءَ پنچ بڑھ ءِ لاشان آپ تیاب ءِ سر ءَ تیلانک داتگ ات ءُ میر مولاداد گْوشگ ءَ ات کہ ائے مڑھ ملکی نہ اتاں بلکنا دور چہ پنجاب ءَ تعلق داشتاں کہ ایشاں امانت، کنئگ بوتگ اَت ءُ گور کنگ بوتگ اَت۔

میر مولاداد دششمی مردم ءِ ھالاں داتگ اَت کہ پنچ مردم بڈشت اَت،مُرت اِت اَنت، بلے آیانی ششمی سنگت زندگ دراھتگ اَت ءُ مسیت ءِ تہ ءَ باھوٹ بوتگ اَت کہ میر مولاداد ءِ گْوشگ ءِ رو ءَ اے ششمی مردم چہ سرام ءُ ترس دماغی صورت ءَ بروبر نہ ات کہ وتی ھول ءُ ترسانی نیام ءَ آ حال داتگ ات کہ آ چہ کراچی ءِ بندر ءَ یک بوجیگ ءِ تہ ءَ سوار خلیج ءِ ملکان رَوگ ءَ اتاں کہ اے درائیں کاران آ چیروکائی کرتگ ات۔ وھدے کہ آ چہ کرچی ءِ آپان دراھتگ اَت ءُ چہ گوادر ءَ گْوزان جمڑی ءِ آپانی تہ ءَ پترتگ ات تو جمڑی ءِ تیاب ءَ روژنائیاں گنداں بوجیگ ءِ مالک آیاں پرماتگ اَت کہ گوں بوجیگ ءَ بندوکیں یک دار ءِ تہ ءَ سوار بباں ءُ اد ءَ دبئی برواں !… کجا دوبئی ءُ کجا جمڑی، بلے آ نہ زانتاں ءُ آیانی حیال ھمیش ات کہ جمڑی دوبئی انت، کہ اے درا بوجیگ ءِ مالک ءِ پریب کاری اتاں کہ اچ آیاں زر زتگ ات ءُ آ بزھگ پہ کارءُ روزگار ءَ خلیج ءَ روگ لوٹ اِتاں ۔

یکدار ءِ سر ءَ سوار بُوگ ءَ رند وھدے آ جہلانکیں آیانی چولانی چیر ءَ اھتگ اَت تو چول آیان برز زرتگ اَت ءُ جال زر ءِ گْور ءَ جتگ اَت کہ رند ءَ ھمے ھولکی ئیں مردم ءِ گْوشگ ءِ رو ءَ یک کوہ ءِ پیمیں چولے آئرا زرتگ اَت ءُ گوں تیاب ءِ کوہ ءَ جتگ اَت کہ وھدے آ سما کرتگ ات تو وت ءَ را زندگ ءُ سلامت حُشکیں ڈگار ءَ دیستگ ات، ءُ پدا جِہان ماھی گیرانی میتگ ءِ تہ ءَ باھوٹ بوتگ اَت کہ اے مردم ءَ را انتظامیہ ءِ دست ءَ دیگ بوتگ اَت کہ لاشان امانتی گور کنگ بوتگ اَت۔

میر مولاداد ءِ کسّہ پُر ارمان ءَ پر افسوس اَت، من ءَ اے واقعہ ءَ سر سکّ ارمان اھت۔

پدا جمڑّی ءِ گْوزِند ءَ روچ ءِ ایرمات ءَ چاران من حیال کرت کہ اے دنیا ءِ تہ ءَ مئے درجگ چہ یک مکسکے ءَ کسان ات، گْونڈاَت بلے مئے شعور ءِ تہ ءَ اے درائیں دنیائی ءِ عکس درا بوت کہ زند ءِ لیکہ ھمے شعور ءِ پراھی ءَ کشادگی ءَ بگیر دگہ چے اَت؟

وھدے روچ کپت، ایراھت ءُ ایرمات بوت تو ماں تہ ءَ پُترت ایں ۔۔۔

٭٭٭

3 سُہب 5 نیمروچ