کسہ

توکلی
2 مِنٹ ءُ 43 سِکِنڈ ءَ وانَگ بیت

کِسّہ ءِ بارو ءَ

''تئی کوٹی سرجم ءَ شنگتگ؟'' آئی گوں پترگ ءَ جست کت. ''هو... اے منی پیم ءَ اِنت'' من پسو دات. آئی بچکندت ءُ دکیانوسی زمانگ ءِ تہت ءِ سرا نشت. آئی چم انگت ءَ کوٹی ءِ بالاد ءَ سک اتنت. ''اے تلیں دیوال سک نزور اَنت تئی سرا کپ انت'' آئی وتی کش ءِ دیوال ءِ تل دست جت انت ءُ منا گشت.

''تئی کوٹی سرجم ءَ شنگتگ؟''

آئی گوں پترگ ءَ جست کت.

''هو... اے منی پیم ءَ اِنت''

من پسو دات. آئی بچکندت ءُ دکیانوسی زمانگ ءِ تہت ءِ سرا نشت. آئی چم انگت ءَ کوٹی ءِ بالاد ءَ سک اتنت.

''اے تلیں دیوال سک نزور اَنت تئی سرا کپ انت''

آئی وتی کش ءِ دیوال ءِ تل دست جت انت ءُ منا گشت.

''منی پیشانی ءِ کرچکانی ءُ اے دیولانی تلانی مانا یک. ما ہر دو نزوریں''

اے رندی آئی نکندت. انچو گشئے آئی ساری ءَ زانت کہ من ہمے پسّو ءَ دیاں.

''تهت ءِ سرا بیا''

آئی وتی ۂزار کسّہ کماۂوکیں چم چست کتنت ءُ منا آواز دات ءُ من آئی چماں چہ برگشتگ اِتاں ءُ وتی تہت ءِ نزوری ءَ جیڈگ ءَ اِتاں. من کہ تہت ءِ سرا اتکاں داں درستاں پیسر منی چم آئی ہما چماں کپت انت.

''تو گپے زانئے!...تئی چماناں کسہ ماں''

من گشت.

''چونیں کسہ؟ منی چماناں کسہ مان نیست''

آ گوں وتی لنککاں لیب ءَ ات.

''کسہ همک چمانی باپشت ءَ است''

من آئی مان اڈیتگیں لنکک گیشینت انت ءُ گشت. آ هاموش بوت. من زانت هبر ءُ جیڈگ یک ساهت ءَ نبیت. آ هاموش اِنت گڈا الّم جیڈگ ءَ انت.

''من زاناں تو وتی کسہ ءَ جیڈگ ءَ ائے''

من آئی ءَ را هال دات. آئی دست انگت ءَ گوں منی لنککاں سر ءُ چیر ات. آئی ءَ اے بے باوریں تہت ءِ سرا چہ وتی سر چست کت ءُ وتی لنککاں گوں منی چماناں دست جت.

''تئی چمانی ءُ اے کوٹی ءِ دیوالانی رنگ یک پیم ءَ شتگ، تئی چماناں اوں کسہ مان''

من هاموش بوتاں ءُ آ اوں هاموش.....پدا اے گرمیں تہت ءِ سرا شیراں لہڈ کنگ بندات کت، پهل گوں یکے دومی ءَ جنگ ءَ اِتنت ءُ ژندیں تہت ءِ نزوری کجا رپت من نزانت. جنگ سرجم ءَ کٹگ بوت ءُ ما چو هید ءَ میچلیں سپاهی ءَ دم برتگ ات بلے...کسہ...؟ منی ءُ آئی ءِ کسہ جنگ ءَ هما دیم پشت کپتگ ات. منا پدا جنگ ءَ هما دیم رؤگی ات آئی کسہ ءِ هاترا. من کہ جنگ ءَ هما دیم رپتنت گڈا کسہ دو اِتنت منی ءُ آئی.

''تئی کسہ کجام انت؟''

من آئی ءَ را جست کت. آ واب ءُ آگائی ءِ میان ءَ تہت ءِ بکشاتگیں نگیگی ءَ گوں جنگ ءَ ات...هاموش ات. آئی بچکندت ءُ جست کت.

''تو سرپد ءِ زیبائی چے اے؟''

''هو! جنگ ءِ وهد ءَ سنگر مٹ کنگ ءِ نام انت''

''اناں زیبائی چو منی کسہ ءِ پیم ءَ انت اگاں زیبائی مبیت کسہ اوں نبیت ءُ نا کہ کسہ ءِ جست کنوک...تو سرپد ءِ زیبائی ءِ اوں رنگ مٹ بیت چو اے دیوالانی رنگ ءِ پیم ءَ. یک روچے ہزار رند ءَ چہ گیش میهه جتگیں دیوالانی دلبند ءَ تہنا ٹپ پشت کپنت...ہمے پیم ءَ منی اوں دلبند ءَ تہنا جنگانی کؤنیں نشان پشت کپنت ءُ تو زانئے اے جنگ پمن ءَ چیا بنت...؟ اے جنگاں شُد کنت. داهمی شُد کہ چو زیبائی ءَ آئی رنگ مٹ نبیت ہر وهد ءَ پشت کپیت''

آ یک بر ءَ هاموش بوت ءُ آئی کسہ...آئی کسہ تهت ءِ سرون ءَ ایر ات.

ایدگئے سہب ءَ وهدے من چم پچ کتنت داں دروازگ پچ انتءُ آ شتگ ات. آئی وتی کسہ اوں برتگ ات گوں . منی چم کوٹی ءِ دیوال ءَ کپت انت ءُ دیوال....نزور ترّان ات.