وت کُشی

 گْوستگیں سالءِ عکس کَشّی ءِ مقابلہ ءَ من ہمے ھاترا دَربازی بوتاں کہ منی جوڈ کُتگیں عکس یکّے وا جنکی عکسے اَت ء ُ دومی ایش کہ عکس جاندرا ئین ے اَت۔ہمے واستا لس مردمانی تہا اے عکسءِ ایر کنگ ء ُ پہ مقابلہءَ پیش دارگ ءَکمیٹیءِ مردُماں نہ مَنّ اِت۔چونائیءَاے عکس کمیٹیءِ مردُمانءَ وا سک دوست بوتء ُ آہاں منءَ اے سَدّکی داتگ اَت کہ اگں پہ مقابلہءَ ایر کنگ بہ بیت تہ ملکء ُ چہ ملکءَ ڈنّ اوں مردُم اِشیءَ دوست دار اَنتء ُ اول نمبرءَ تئی عکس کیت۔بلے چُش کہ کمیٹی ءِ مردُماں اے تُرس اِنت کہ اگں اے رنگیں عکسے کہ جاندرا اِنت پہ مقابلہءَ ایر کنگ بہ بیت تہ اے ملکءَ بازیں قوّت کہ  اَست اَنت آہانءَ اَنچیں نیمونے لوٹیت کہ آ اے انڈسٹریءِ جندءَبندبہ کنائین اَنت۔دومی گپ ایشنت کہ مئے لاپءِ اوں سوال اِنت،اگں ایوکءَ لاپءِ سوال بوتین بلکنءَ ما تُرسءِ آماچ نہ اتیں بلے بوت کنت کہ اِشیءِ ہمراہیءَ نیکراہی یَڈّک مئے سرا اُرش بہ کن اَنت ۔ اے مقابلہءَ ملکءِ،ءُ چہ ملکءَ ڈنءِ زالبولء ُ زھگ اوں ھوار اَنت۔"ہؤھمے واستا ما تئی اے عکسءَ پہ مقابلہءَ ایر کُت نہ کناں۔" کمیٹیءِ مردُماں اے رنگءَ گْوستگیں سالءَ منءَ دربازی کُتگ اَت۔

 بلے اِمبراں کہ مقابلہ بووگا اِنت منءَ سالے بیت کہ عکس  یےءِ جوڈکنگاہاںء ُ سَدّکاں کہ اے منی زِندءِ مستریں سوب مندی بیت ء ُ دنیاءُ جہانءَ منی نام روژناہ بیت منی جہد ساڑا ھگ بنت۔اے عکسءِ ہمراہیءَ منی جندءِ عکس اوں مشہور بیت ۔ڈنّی ملکاں پہ نمائش ءِ واستا اوں منی عکس لوٹائینگ بَنت۔من تَلّو(اسٹیج)ءِ سرا لوٹائینگ باں،ہزاراں مردُم منی واستا چاپ جنتء ُ منءَ وش اَھت کن اَنت۔ہر لوگءَ منی ساز اِتگیں عکس دْرنجگ بنت۔

"انچش سما بووگا اِنت کہ   مردُم درہا منی ودارءَ اِتاں۔۔۔گُڈّی عکس کَش من اِتاں کِساس دو سَد مردُمانی کَشّ اِتگیں عکس چارراہءِ سرا درتکگ اِت اَنت کہ ھالیگیں جاگہءَ منی نام نبشتہ اَت۔من کہ چہ اَپسءَ ایر اتکوں ءُ پہ تَگ شُت ءُ وتی عَکس ہما ھورکیں جاگہءَ درَتک کہ آئودءَ منی نام نبشتہ اَت۔من کہ واتر مردمانی رِدءِ نیمگا اَتوں داں لکھاں مردُم منی واستا چاپ جنگءَ اَت۔۔چاریں نیمگاں ورنا سیِٹّ جنگءَ اِت اَنت۔۔ہر یکے منءَ وش اَھت کنگءَ اَت۔۔ءُ ہر یکےءَ لوٹ اِت گوں منءَ سیلفی یے بہ کَشّ ایت۔۔۔جار چینءَ جار پِرّینت کہ مرچیگیں مقابلہءِ دُرسیں عکساں چہ شرتریں عکس ہمیش اِنت کہ گچین کنگ بوتگ۔۔۔یکبرے پدا چاریں کُنڈاں چاپانی توار مَچّ اِت اَنت۔چہ گلءَ منی چمّ نمب بوتاں۔۔۔مرچی من وتی منزلءَ رستگ اوں۔۔۔۔۔!!

 ـ,,  ہاہا۔۔ہاہا۔ہا۔ہا۔ہاہاہا۔۔۔۔،،  ۔۔من گُڈاِتوں۔۔عکس چہ دستءَ لَگُشتءُ پادانی دیم ءَکپت۔۔۔داں گِنداںمنی ساھگ منی سرا کند گا اِنت۔۔ءُ آئیءَ گُشت کہ ,,دلءَ پہ واجہءَ بگیر مان نیست۔۔۔ہاہا۔۔انسانءِ دِگر اَنتء ُ قدرتءِ دِگر اَنت ۔روچءَ واب گندگ شر نہ اِنت۔۔۔ناں چُش بوتگء ُ ناں کہ بیت کنت،، آئیءَ گوں ٹہکاں منءَ دَرّائینت۔

 من ھُشکء ُ ھیران بوتاں کہ گوں من ہچبر چُش نبوتگ۔منی جندءِ ساھگ اِنتءُ منءَ ہچ ھساب نہ کنت۔۔ء ُ منی اے ساچشت کہ سالے بیت ایں من شپ روچ اشیءِ سرا جہد کُتگء ُ اشرا جوڈ کتگ،وتی دلءَ داشتگء ُ پہاز اِتگ۔۔۔من دلءَ سدّکاں کہ اے بری من الّم سوبین باںء ُ منی نام چاریں کُنڈاں شِنگ بیت۔۔۔بلئے۔۔منی جندءِ ساھگ اے ھبرءِ منّگءَ تیار نہ اِنت۔۔۔!

 من توار پِر جت کہ,, تو چہ پیم اے رنگءَ جیڑگائے۔۔۔؟،،  آئیءَ ہچ پسّہ نہ دات۔۔من دو سئے براں توار پر جت بلے چرائی نیمگءَ ہچ پسہ نیتک۔

 اے وئیلءَ من سک نگیگء ُ بے تاہیر بوتاں۔داں روچ برکت بوتء ُ شپءَ وتی مہلبیں زُلف شنگینت اَنتء ُ ماہءَ نُگرہیں جاںکشّے بنا کُت۔من اے عکسءِ دیما نِشتگء ُ جیڑگا اَتوں۔۔کہ باندا تیں روچ کہ ٹِکّ دنت من دُنیائے مستریں عکس کشّءِ بستارءَ زانگء ُ پجّارگ باں۔

 عکس منی دیما ایر اَتء ُ اَنچو ڈولدار اَت کہ چہ ڈولداریءَ شہم دئیگءَ اَت۔۔آئیءِ بلوچی پاگ،چنگیں بروت،دُوچی ایں واسکوٹ،بلوچی چَوَٹ،زاگُلیں سُہریں چمّ،بُرزء ُ بلندیں پونز،کاشیں گُلگ۔۔۔دُرساں زیباتِر آئیءِ باسکءَ لونجانیں شے مُریدی تیِر کمان انچو جلوہ ناک اِتاں کہ منءَ چہ گلءَ واب نیتک۔۔منءَ انچو سما بوت کہ من آئیءَ لیِلو دئیگا ہاں داں سہتے واب بہ کپیتء ُ بانداتیگیں مقابلہءَ مہلہ گوں من ہوریءَ تیار بہ بیت۔۔۔من اوں ہمے شیرکنیں لیِلوانی گْوانزگءَ کوچنڈاں کوچنڈاں کدی واب کپتاں سما نہ بوت۔

 سُہبءِ بامءَ ٹِکّ کتگ اَت چرائیءَ پیسر کروساں لوگءِ پیژگاہءَ بانگ داتء ُ منءَ چہ وابءَ گُڑینت۔دلءَ نہ گُشت کہ نپاداں یلہ دے ء ُ پادا۔۔بلے لاچاری ایش اَت کہ مہلہ شہرءَ سر بووگی اِنتء ُ مقابلہءَ کلاکے پیسر شہرءِ چارراہءَ تیوگیں عکس دْرنجگ بنت کہ لس مردم آہاں چار اَنتء ُ  بیگہءِ بیلءَشر تریں عکس گچین کنگ بیتءُ جار پِرّینگ بیت کہ مرچیگیں عکسانی شَرتریں عکس کُجام اِنت۔۔۔۔!!!

 شہرءَ سر بووگءِ نیامءَ من چہ پیمء ُ کدی تیار بوتء ُ شہرءَ سر بوتاں۔۔۔ہچ سما نہ بوت۔من گُڈّی عکس کَش اَتوں کہ وتی عکس چارراہءِ سر اندگہ عکسانی رِدءَ دْرَتکء ُ پُشت مانداتء ُ زِرباری نیمگءَ اوشتوکیں مُچّیءِ نیمگءَ رَوگا اَتوں کہ چہ پُشتی نیمگا ژپّگءَ منءَ تیرےءَ سُپتء ُ چہ سینگءَ در لگُشت۔۔ہونءَ پیِنژار بست۔من گوں بالادءَ شکُون دیم جہلءَ کپتوں۔۔۔ارواہءِ بال کنگءَ پیسر منی چم پہ وتی جوڈ کُتگیں عکسءَ کپت اَنت کہ تیِر کمانے ٹال اِنتء ُ دومی تیِرءِ جنگءَ نِشانگے داشتگ۔۔۔! 

(دلگوش: اے آزمانکءَ من تاکبند" کِسّہ" گوادرءِ مِنّتءَ شِنگ کنگءَ اُں کہ اے آزمانک "کِسّہ گوادر"ءِ اولی تاکءَ شِنگ بوتگ۔ منت وار)