آس ءُ برپانی نیام ءَ

3 مِنٹ ءُ 43 سِکِنڈ ءَ وانَگ بیت

کِسّہ ءِ بارو ءَ

سردی ھمنچو باز ات کہ ھرچ ساہ دوت دیگ ءَ ات ، کسانی ءِ باکلین والا یات پیداک ات ، بازار ءِ کہن ءُ سہب ءِ شنکانی دریک ءُ داک ۔ اے مردم کُشیں سردی ءَ درائیں ھیال بادینتگ ات انت ۔ من وتی مسکتی دراجیں کوٹ ، دستاں دستانہ ءُ یک باپیں کُلائے ھم سر ءَ کُتگ ات ۔ بلے اے دُرائیں پُچ ءُ پوشاکانی تہ ء۔

سردی ھمنچو باز ات کہ ھرچ ساہ دوت دیگ ءَ ات ، کسانی ءِ باکلین والا یات پیداک ات ، بازار ءِ کہن ءُ سہب ءِ شنکانی دریک ءُ داک ۔ اے مردم کُشیں سردی ءَ درائیں ھیال بادینتگ ات انت ۔ من وتی مسکتی دراجیں کوٹ ، دستاں دستانہ ءُ یک باپیں کُلائے ھم سر ءَ کُتگ ات ۔ بلے اے دُرائیں پُچ ءُ پوشاکانی تہ ء۔ انگت سردی منی جسم ءَ ایر روان ات ۔ چپ ءُ چاگرد اسپیت اسپیت ات ، مُلوک ءِ بازار ءِ اے اولی برپ باری ات ، من زندگی ءَ پیسر ھنچوک اسپیتی یکجاگاہ بہہ نہ دیستگ ات ۔ مرچی سالے ءَ پد من وتی بازار ءَ واتر بوتگ انت ، تنکیں کوٹی ءَ منی نپس در نہ اتکگ ، چم چار گام دیم ءَ نہ شُتگ انت  ۔ بس ماہ ءَ پیسر منی مستر ءِ دل ءَ رھم شوت ءُ منی چٹھی من ءَ رست انت ۔ من بس ءِ ودار ءَ وتی کیسگ ءِ گُڈی سگریٹ بُن دات ۔ مُلک ءَ سگریٹ ءِ کشگ دو ھمنچوک وش انت ، اے پچیں دیار ءَ ھر نیمگ ءَ منی کسانی سروک دیگ ءَ ات ۔ برے چینال ءِ سر ءَ من گوں وتی سنگتاں دریک ءُ دراک ءَات آں ، برے ماں اسکول ءِ ڈسک ءِ سر ءَ کیلاہ ءِ گوماں نام نبشتہ کنگ ءَ ات آں ، برے گوں مسکان ءَ شیپانی کلگ ءَ مرگ ءِ شکار ءَ ۔مسکان ! باریں نو چون انت ، ڈاکٹر ءَ دو روچ ساری من ءَ گُشت کہ دل ءِ آپریشن انت ۔ اے بس مرچی چیا چو دیر کنگ ءَ انت ۔ من ءَ وتی لوگ ءَ روگی انت ، وتی پیشگاہ چارگی انت ، باریں اے برپ باری ءَ منی لوگ ءِ راہ چون کُتگ انت ، مات ءَ گُشت کہ ھار ءَ پِل پروشتگ ھرچ نیمگ ءَ ڈنگر دئے دومی نیمگ ءَ پس دور کن انت ۔ دُزیں پس ءَ ستر اشکیل بہ کن وتی دریک ءُ دور ءَ یلہ نہ دنت ۔ سگریٹ ھلاس ات من بُنڈ ءَ کشگ ءَ ات آں ۔ کور ءَ بازیں مردمے برتگ ، شکیل ، نسیم ءُ جمال ناسرپد انت اگاں آپ لانکے ءَ بُرز انت ، کے مان دنت ۔ مرچاں آپ لوگانی تہ ءَ سر جنان انت ۔ لوگ ءَ رسگ ءَ گوں اولی کار ٹرکٹر والا ے گرگی انت ، اے آپ لوگانی جند ءَ مبارت ۔ راہ ءِ اے سر ءُ آ سر ءَ چار ات بس گار ات ، دور دور ءَ گاڈی ءُ سینکل والا ئے ھم زاھر نہ انت ۔ دل ءَ گشت رواں لوگے ٹُکاں ، آسے ءِ دیم ءَ وتا باپ دیاں ، اگاں بس بروت ۔ برپ گیش رچان ات ۔ منی درائیں گُد اسپیت بوھگی ات انت ۔ من یک رندے پد ءَ وتی کیسگ ءِ زر چارت انت دل ایمن بوت کہ نو زند ءِ جنجال ھلاس بنت ۔ 

سردی برداشت نہ بوھگ ءَ ات ، من دیم پہ لوگے ءِ شوھاز ءَ پشتی نیمگ ءَ شُتاں ۔ اد ءِ لوگ کُج ءَ انت ، اد ءَ منیر ءِ پسیل بوتگ ، کُجا لڈتگ انت ۔ دیم پہ دگہ لوگے ءِ شوھاز ءَ سر سرجنان بوت انت ۔ اے بازار ءِ لوگ گار ات انت ۔ اد ءَ بلائیں بازارے بوتگ ۔ من لہتیں لنش ءُ پتار یکجاہ کُت کہ آسے جمبور کناں تریں دار کُجا روک بیت ۔ منی جسم ءِ رگ ءُ ریشگ ٹنٹورتگ ات انت ۔ منی وتی دست جسم ءَ پتات ءُ درچکے ءِ بُن ءَ نشتاں ۔ سرجمیں زمین ءُ زمان اشپیت ات ۔ دل ءَ گشت رواں دیم ءَ بلکیں لوگے دراہ بیت ۔ سر جنان ، رواں بلے نہ لوگے نہ کہ کچکی کلونزگی توارے ۔ روچ ھم بُکگی ات ۔ من ءَ آسے ھمنچوک پکار ات کہ ھمچوک ساہ ءِ کشگ ، ھنچو سردی ءَ منی دست ءُ پادانی رگ سُچگ ءَ ات انت ۔ ھچ چیز آس گرگ ءَ نہ ات ھر چیز تر ات  سرجمیں دیار ءَ بس ھشکیں چیز منی کیسگ ءِ زر ات انت ۔ یک نیمگے منی زند ات ءُ دومی نیمگ ءَ منی زند ءِ وشی ، لوگ ءِ جنجال ۔ درست منی ودار ءَ بنت ، پیریں مات ءِ بزگی ، مسکان ءِ آپریشن ۔ منی ھیالاں کورے تچگ ءَ ات ، دُرائیں دُزیں ھیال منی زہن ءِ تہ ءَ دِرک ءُ داک ءَ ات انت ۔  یک دستے ءَ منی باکس ات ءُ دومی دست ءَ منی بنڈلے زر ۔ من جیڈگ ءَ ات آں ۔۔ برپ منی ھیالاں بادینگ ءَ ات ۔