عکسے ءِ خمار ءَ

"من ءَ بیست ءُ پنچ سال انت کہ ھمے ھونڈ ءِ تہ ءَ آں" ۔  "دروگ بند ایت"۔ دیم ءَ نشتگیں کماش ءَ درائینت۔ "اگں اے بیست ءُ پنچ سال ءَ ھونڈ ءِ تہ ءَ بہ بوتیں اشی ءِ چم زرد بوتگ اِت انت۔ اشی ءِ چم وا مئے وڈا انت"۔  اے کسہ ءِ اولی ٹکر ات۔ چد ءُ دیم اے کسہ وروکاں زیم کتگ ات۔ ھمدا چہ کسہ ءِ بلاھیں ٹکرے گار ات۔ آ زانگ ءَ نہ ات کہ دیم ءَ چے بوتہ۔ اے کسہے ءِ سئے(3) ٹکر ات انت کہ آئی ءَ کہنیں بانے ءِ تہ ءَ دست کپتگ ات انت۔ گشنت کہ یک زمانگے اے کسہ کارے ءِ لوگ بوتہ۔ شریں دمانے ءَ پد کسہ ءِ دومی ٹکر آئی ءِ دست ءَ ات۔ کسہ ءِ دومی ٹکر ءِ تہ ءَ مونولوگے ءِ لہتیں رد پشت کپتگ ات بلے کارست ءِ جند زانگ بوگ ءَ نہ ات۔ آ اے وڈ ءَ ات۔ "ایوکی ساچشت ءِ مات انت۔ برے برے من ءَ گمان بیت کہ یک انچیں وھدے اوں بوتگ کہ "ارواح" تہنا بوتگ۔ آئی ءَ بازیں مدتے پہ ایوکی گوازینتگ۔ باز وھد گوزگ ءَ پد آئی ءَ وش نہ بوتہ ءُ ھمدا اولی رند ءَ آئی ءَ وتی ازم ءِ درنگازی کتہ"۔ آ گیشیں چرتے ءَ کپت۔ آئی ءِ سر ھچ پر بوگ ءَ نہ ات کہ کسہ ءِ تہ ءَ اے ٹکرانی اسل جاگہ کجام انت۔ ھمے نیام ءَ آئی ءِ چم پہ سیمی ٹکر ءَ کپت انت۔ اے تہنا یک رِدے ات۔ اے رد ءِ وانگ ءَ پد آئی ءَ ٹکر درت ءُ دور دات۔  آ نہ لوٹگ ءَ ات کہ کسے اشی ءَ بگند ایت۔ چیا کہ اے ٹکر ءِ تہ ءَ کارست ءِ نام پدر ات۔ آ دل ءِ تہ ءَ بچکندگ ءَ ات۔ ءُ جیڑگ ءَ ات، "اے کسہ نا سرجمی ءَ براھدار انت"۔