وشـــی انگت وانڈہ اَت

میتگ ءِ اِنسرگءَ پَد کُچکانی ھُولاسگ کم کم ءَ ودّان اَت- باز لوگءَ انگت چراگ ءِ مِرمرانکیں رُژن ٹمبگءَ اَت -

زئی ئیِں بیگاہ ءَ جَمبراَت ھَورءِ گُماں اَت - مرچی ھَمیش اِنت کمیں ساری تِرءَ گوریچءَ لانک بستگ اَت ءُ دَنزءُ آڈھوراَت چم پہ چم ءَ میم بوگ ءَ نہ اَت ءُروچ ھم دنزانی تہ ءَ نوکی دستءُ پاد جناں داں کُوہءِ کنڈءَ اندیم بوت -

شپ ءِ ایردیگءَ گوں گوریچءَ ھم سوب کُت ءُ وتی بانزل جھل ترءَ ایر دات اَنت -بزگیں پُگلانی بس ھما یکیں شپ بوت ـ دوشی اللہ ئیں شپ ءَ واب نہ کپتاں ٹرٹراِش کُت-

انشپی گوریچءِ پیش سلام ءَ گوں پُگلاں وتی ٹپربستاں باریں کُجام نیمگادیم پہ سپر ءَ شُت اَنت؟

میتگءَ روباھے دُوزاَت ھَموشپ داں بام میتگءِ پُشت ءُ دیم ءَ تراِت ءُ کھوکھویےء کُت -

میتگءِ مردمانی گیشتردلگوش کُچکانی ھولاسگاں گوں وت برتگ اَت گوریچءِ شیکگانی تہ ءَ دُورءَچہ کلھوکے روباہ ءِ کوانرگءِ توار آتک کُچکاں کہ روباہ ءِ تواراش کُت آھاں اَلھاں کُت ـ

مراد ءَانشپی مھمد علی دبئی والا دَاوت کُتگ اَت پَسّے کُشتگ اَت -روت ءُ سگندانک کورءِ آپ تچءَ گُورک گیریں تلکّے ئے میاں ءَ ایراَت اَنت -

مرادءِ دلگوش گیشترتلکءِ نیمگءَ اَت  آئی ءِ ھیال واب ءُ نیم واب اَت آئی ءَ زانت کہ اے گُھہ وارءُ یلچریں کُچکاں انوں گوریچ ءِ سارتی پلار چوپ کنت داں بانگواہ ءَ ساری کُچک باریں کجام دازءِ ھونڈءَ سرءَ جِک دَئنیت ءُ دوتَلّ بنت -

آئی ءَ اے ھم زانت کہ روباہ ءَ شُدّ ءُ ھالکیں اُوجرینک وَپسگ ءُ آرام ءَ نِلیت اَنچوش کہ کُچکانی توارنیم شَلونک بیت روباہ کوہءَ اِیردَنت ءُ کیت پہ روت ءُ سگندانکانی ورگءَ دلگوش بیت- ھمے ساھتءَ تلک پہ بے انّانی سَرپیت ءُ آئی ءِ گُٹ ءَ پالومپ بیت ءُ آئی ءَ راوتی زرونکانی چیرءَ لگت دَنت روباہ کوکار کنت پریات کنت تلوسیت روباہ کوکروبانگ کنت روباہ اے ھم گُشیت کہ منءَ دگہ بَرءَ مردمانی سُندانی دَست جَنگ توبہ ءُ بیزار اِنت مرادگوں ھمے ھیالاں کمیں بچکند اِت ءُ دلءَ گُشت ئے بلے آسن ءِ تلکّءَ کئے سرپد کنت کہ روباہ ءَ توبہ کُتگ؟

گوریچ ءِ شیکگانی پُشتءَ چِرتانی توارءِ لھمیِں گالوارے کم کم ءَ رُجگءَ اَت ءُ دازءُ درچکانی ژمب ژمب ءِ توارھم یک ھسابءَ برجم اَت-

دلجان ءُ نازگل ءِ آروسءَ مرچی ئیں روچءَ سالے کُبل بوتگ اَت ءُ اے گپ ءَ سرجمیں میتگءُ شھر سھیگ ءُ سرپد اَتاں کہ اے دُوئینانی واب جاہ ءُ نپادانگت جتا اَت اَنت بس سیادی ئے رگ برجاہ اَت نہ واھشت ھستگ اَت نہ رزا ءُ منشاہ-دوئینانی مات ءُ پت وش واب اَت اَنت آھاں پہ سیادی ءِ نزیک کنگءِ ھاترءَ دوئیں پہ زورآروس کُتگ اَتاں بلے دلجان ءُ نازگل ءِ واھگانی چم کانٹ اَتاں دوئیں انگت سرپد نہ اَتاں کہ آروس ءِ وشی ءُ لزت چے اِنت؟

وشی ءَ سک دیراَت کہ وانڈہ اَت رَمّگءِ کوہ اَت آئی ءِ چُک چلانگ درست گوں اَتاں -وشی گنوکے وشی اپشالے وشی پہ دیمیں مردمے وشی مال دوستے وشی پہ مالانی دوستی ءَ تاسپ ءُ تلاھیں چُک گوریچ ءِ سرءَ بزگ کُتگاں وشی ءَ ھوشے تُش نیست سکیں جٹیِں مردمے -میتگ ءِ مردماں کہ دیوان ءَ کمرزانی بست گڑا درست وشیءِ پُچکاں اَتاں-

مھمدعلی چہ دبئی ءَ آتکگ دیم ماہ ءِ نوک ءَ آئی ءِ چُکانی آروس اِنت آئی ءِ دلءَ بوتگ کہ وتی یکیِں چُکءَ وتی گھارءِ زامات کناں بلے آئی ءِ چُکءَ زھرکُتگ ءُ نہ منتّگ -،آئی ءِ چُک ءَ ھمے یکیں گپ گِپتگ ءُ داشتگ کہ مرگ ھست زند ھست من شیرمھمدءِ جنوزامیں جنکءَ آروس کن آں من دگہ کس ءَ نہ زوراں اگاں شُما منءَ زور کُت من وتءَ سادے لوپ کناں ءُ کُشاں-

شپءِ ایمنی ءَ کُچکانی توارچیرترتگ اَت مُرگے ئے کوار کوار ءِ توارءَ میتگ ءِ سُبک وابیں مردماں سرچست کُتگ اَت -

کُچک سال واب ءَ اتاں گوریچ ءَ وتی گام بوگےءَ ترندترکُتگ اَتاں مرادءَ ھَمیش اِنت انوں کلھوکے بیت کہ واب کپتگ اَت تلک انگت روباہ ءِ ودارءَ گوریچ ءِ سرءَ اے ساھت ءُ آساھت کنگ ءَ اَت چِرتاں دزنماز گپتگ اَت ءُ نوکی بانگواہ ءِ ھُواللہءَ دلمانگ اَتاں نازگل ءُ دلجان ھَماپادءَ شُدّ لاپ ءَ اے دست ءُ آ دستءَ لیٹگ ءَ اَتاں -

وشی ءَ را گوں چُکاں سارتی ءَ تنچتگ اَت ھَمیش اِنت کہ کترھے بیت نوکی وانڈہ جاہ ءَ آس روک اَت آس ءِ کَش ءَ آگوں چُکاں وت ءَ تاپگءَ اَت وشی ئے لوگ بانک ءَ نوکی آرت کَشتگ اَت ءُ ترکنگ ءَ اَت ـ

کمیں ساری ترءَ وشی ئے دلءَ اَت کہ شَنّکاں پچ کناں ءُ زاتگاں کدوم کناں کینگراِں دوشاں تومی ئیں پاچن ءَ کدیم کناں بلےانگت سارتیءَ آئی ءَ تھمل نہ کتگ اَت-

آئی ءِ لوگ بانک ءَ آستینک لانکگ اَتاں ءُ آرت ءَ تَرکنگءَ اَت

مھمدعلی گوستگیں روچءَ بجاری ءَ آتکگ آئی ءِ چُک ءِ آروس جریدگ اِنت اش کنگ ءَ دیم ءِ ماہءَ آروس اِنت وشی آس ءِ داراں دیمءَ کناں ءُ وتی لوگ بانک ءَ را ھال ءِ دات-

آئی ءِ چُکءَ را سُھروک ءَ گپتگ تپ ءِ سرءَ شُتگ مُلا اللہ داد پانگ اِنت دَم کنگ ءَ اِنت وشیءِ لوگ بانکءَ اشکر یک کرکُتاں ءُ پرانی آسءَ کناں ءُ پَسّو کُت-

وشی ءُ لوگ بانک ءِ گپ انگت آسر نہ اَتاں کہ زمین جُمبیں تراکے ءِ توار ءَ بانگواہءِ ایمنی تُش تُش کُت ...درچکانی سرءَ مُرگاں کپرگءَبال کُت دو پِرک کپرکپرکناں اَتءُ وانڈہ جاہءِ سرءَ گوست اَنت ـ

وشی پسّاں ڈاہ کُتگ اَت ءُ تگ اَتاں دیم پہ کورءَ شُتاں وشی پچگڑتگ اَت دستءِسریں اَت اَنت ءُ میتگ ءِ نیمگءَ آڈھوریِں دنزاں چارگءَ اَت ـ

وشی ءِ چُک ھزتگ اَتاں وشی گدان ءِ تگردءِ لمب چست کُت ءُ گُرکی چہ پوش ءَ در کُت ـ

گڑک گڑک بلٹءِ کُت -

ساھتے ءَ پد آگوں چُکاں کوہ ءِ دیم ءَ زُکرتگ اَت دُورءَ چہ جگا جگاءُ سلواتانی تواررُستگ اَت ـ

میتگ ھُشکیں دنزءُ گبارے اَت -

لشکر ءَ وتی دیم سیاہ کُت وشی گُرکی چِست کُت ءُ نظرگپت-