ودار ءِ درد

من وتی زند ءِ ہمُک روچ ءَ ہمے اُمیت ءَ گْوازیناں بلکیں یکّ روچے تئی ودار ءِ ہزّام بیت ءُ تو منی کُل ئے دپ ءَ واتر بئے۔ ۔ ۔

بارے منا تئی تْرانگ ءِ گم رنج دئیاں باریں دنیا ءِ بے سریں تژن منی باتن ءَ آس پِر دار اَنت۔

بارے تئی زبہریں زہیر منی ارواہ ءَ سُمبنت۔ ۔ ۔

ہمسروگ ءُ دزگْہار دْرستاں آروس کتگ ءُ چُکّانی مات اَنت میتگ ءِ زالبول نِند اَنت باپُشت ءَ منا ڈوبار اَنت ءُ ہزار گپّ گُْشنت مُدام تژن ءُ شِگان جَن اَنت کہ جنین چُک گْور ءِ دُکان اِنت ہزار رؤت ءُ ہزار کئیت اِیں ہزار گْواجر پہ من کئیت ءُ رؤت اِیں بلّے وائے نصیب کہ نہ تو کا ئے نہ تئی اھوالے کئیت اِنت چُوش وَ دنیا ہزار گپّ ساچ اِیت تئی باپُشت ءَ بلّے اے گپّ چْوں زِرگْوات ءَ گْوزَنت ءُ راونت منی چمّاں ہاک مان نکن اَنت۔

مُدام تئی ٹیکی کہ پمّن نئیتکاں گڑا میتگ ءِ مردماں گْشت تئی سانگبند زانا ترا دوست نداراں تئی دشتار نہ وت کئیت ءُ نیکہ آئی ءِ سلام ءُ دعا۔ ۔

بلّے مُدتے بیت کہ من کسّی گپّاں کِمار نکناں " بس ماتو ءِ یکّیں تژن ءَ منا کُشتگ" تئی بے متلبیں ودار اَنت آ مرد ءَ وت ءَ را ساہِگ نیست تئی سرا چتور ساچان بیت تو نشتگ ئے کہ پہ تو کئیت اِیں پہ آئیئے واستہ مہ نِند مُوداں سَر ءِ اِسپیت مکن سانگ ہمدا نزیک ءُ گْور ءَ بکن دَر ملکی کپُوت رامگ نہ بنت"

گپّے کن اَنت کہ کؤر ءِ دپ بندگ بیت بلّے قوم ءِ دپ دارگ نہ بیت۔ ۔ ۔

واکی ہنچوش اِنت۔ !

بلّے تو زان ئے منا تئی گم ہنچو دوست بنت ہر روچ تئی بان ءِ ساہِگ ءَ نِنداں وت گریواں وت وتا سَڑیناں دل ءَ تاہیر دئیاں۔ ۔ ۔

تئی رؤگ ءَ چے پیسر من نزانتگ اَت کہ ودار ءِ درد زِرد ءَ تہار ءُ ہمُک وشّیاں  چہ زبہر کنت۔ ۔ ۔